政府今次修例為有限度註冊醫生提供銜接安排，加入特別註冊制度，其實我喺2017年3月22日一個關於修訂《醫生註冊條例》會議上，已經講過有限度註冊醫生嘅問題，時任食物及衞生局局長高永文答覆指，截至2016年底，共有29名有限度註冊醫生於香港大學工作， 52名於中文大學工作，當中來自格魯吉亞、斯里蘭卡、巴林、阿曼和尼泊爾等地。佢地因未考獲本港嘅執業試，故只能以有限度註冊係香從事醫學院嘅教學、研究工作或執行醫院工作。而醫管局醫生短缺人數達300名，實情係由2011 至2017年6月底，當局共拒絕343個非本地培訓醫生嘅求職申請，當中係咪已經說明申請人專業水平不達標，未能符合駐院醫生嘅條件?
政府一直有透過有限度註冊制度，免試引入非本地培訓醫生於公營醫療機構工作，近年更將註冊年期由1年延至3年，政府嘅說法係可以吸引更多海外醫生到醫管局工作，但睇番醫委會最新嘅數字，截至2019年12月31日，一共引入125名有限度註冊嘅非本地培訓醫生，當中受僱於衛生署有3名、港大有41名、中大有57名，係醫管局工作只有24名。換言之，近八成人係受聘於兩間大學醫學院嘅工作，絕大部分有限度註冊嘅非本地培訓醫生，根本唔係喺公立醫院重災區工作，無法紓緩人手壓力。
我係2016年11月30至2017年1月13日，分別先後進行咗3次問卷調查，就香港醫委會改革收集市民、全港醫生，以及選舉委員會醫學界界別分組選舉候選人嘅意見。結果八成市民(78%)、醫生(83%)、同醫學界選舉委員(85%)，都反對增加海外同內地醫生可以透過有限度註冊方式，即無需考試係香港執業。呢個數字已經好清楚反映有限度註冊制度欠認受性，而最新嘅修正案，更係一再倒退嘅方案!
遺憾嘅係政府一意孤行，將醫學界同市民嘅意見置若罔聞。但我仍然希望政府尊重專業自主，確保醫專繼續履行其法定職能，為專科資格水平把關，並採納醫專及其分科學院嘅建議，就最新嘅修訂建議檢視同調整現時嘅專科註冊資格審核機制，以符合修訂條例需要維護專科培訓、專科資格水平同標準。
另外，我亦要求政府必須承諾讓年青醫生及本地醫科生優先獲專科培訓同實習嘅機會。
陳沛然
沒有留言:
發佈留言