今年2月，正當醫護人員仍在盡力對抗持久嘅疫情戰，政府突然強推《2021年醫生註冊(修訂)條例草案》，呢個政治決定不惜破壞香港人一直堅持公平嘅考試制度和程序公義，更嚴重打擊專業自主!雖然醫學界就今次嘅條例草案指出多項問題，要求暫緩恢讀二讀，希望有多D時間同政府磋商，謀求共識。但政治現實話比我地知，係今日嘅議事廳內，單憑我一己之力，就好似螳臂擋車，係無法改變政府嘅立場同其他議員嘅投票決定。
雖然係咁，我仍要提出一項至為關鍵嘅修正案 ─ 刪去建議第14F(4)條，即賦予食物及衞生局局長一項新增權力:「如認為基於公眾利益而有此需要，可就特別註冊委員會執行其在本條例之下嘅職能，向該委員會發出指令」，令特別註冊委員會擁有十足嘅把關權，喺不受政治干預下，負責制定獲承認醫學資格名單(即政府宣稱會制訂全球100間醫學院嘅名單)，同每3年檢討名單1次，避免官僚凌駕特別註冊委員會，隨時插手醫生專業資格嘅審議程序，甚至推翻任何決定，令委員會淪為橡皮圖章。
陳肇始局長係5月18日記者會上公布條例草案時講過，會係現行《醫生註冊條例》下開闢新途徑 ─「特別註冊」，引入非本地培訓醫生，呢個做法其實已等於置專業自主於不顧，但當中尚有四重關卡要過，包括引入嘅海外醫生必須係香港人。期間，醫學界多個組織同兩所大學醫科生先後發表過意見，而我喺今年6月就條例草案進行一項意見調查，訪問全港醫生、牙醫、醫科生及牙科學生，收回2102份有效問卷中，有八成(79.1%)受訪者反對立法會通過條例草案，係427名受訪嘅醫科生中，更超過九成半人(96%)反對。對於食衞局局長如認為基於公眾利益而有此需要，可就特別註冊委員會執行的職能，向委員會發出指令，則有七成半人反對(74.4%)。
但局長一直無視我地嘅意見，反而係8月31日嘅記者會上，提出三項新嘅修訂，將原先輸入非本地培訓醫生嘅關卡幾乎完全一筆勾銷，政府事前並無諮詢過醫學界，同業對於免試引入非本地培訓醫生感到極度失望同遺憾! 之後局長喺法案委員會上，將「公眾利益」作為推倒重來嘅藉口，但又講唔出所指嘅「公眾利益」係代表邊一方，只求攞足票通過修例，不惜放棄專業水平同病人福祉嘅重要考慮。
其實外來醫生要考試合格先可以執業，並唔係香港獨有，我地熟悉嘅英國、加拿大同美國都要考。你話執業資格試難考，我係呢到用最近幾幾年嘅數字同大家分析下。考試分三部分，英文、專業知識同埋臨床，睇返2017到2019年6次考試嘅資料，專業知識試，嚟自英美加澳呢啲西方國家嘅考生，共190人次參加考試，有約五成三合格，嚟自中國內地有成443人次，但只有一成七人合格，仲有一啲我歸納為「一帶一路」國家則只有一成半合格 。由於當中有成60%嘅考生係嚟自內地，合格率自然被拉低。至於臨床試，西方國家參與人次係162，合格率係51.9% ，中國內地人次係178，合格率有33.7%，而「一帶一路」國家係50%。至於英文試西方國家合格率係100%，中國內地同台灣就52至100%。資格試唔係一次定生死，最多可以考5次。事實上，香港醫生去考英國嘅專業資格試，考兩三次先過到一關好平常。我地亦冇抱怨人地試卷有問題、考試太難，唔會批評人地保護主義，反而更加努力溫習，務求下次過關。
而睇返2017至2020年嘅數據，2017年有36個非本地培訓醫生透過考試成功註冊，佔當年新增正式註冊醫生9.5%，2018、2019年及2020年分別有52人、46人同38人透過考試成功註冊，喺嗰四年新增正式註冊醫生所佔比率分別係11%、9.7%同8.1%。睇到嗰幾年透過資格試註冊嘅非本地培訓醫生係有上升趨勢。
最近，有兩位外國回流嘅醫生接受明報訪問，佢地以自己嘅經驗解釋執業資格試嘅重要性。香港執照醫生醫學會榮譽司庫張醫生由2002至2013年，係澳洲讀醫同行醫，2016年因為考香港執業資格試回流。張醫生話澳洲人較常出現遺傳病「囊性纖維化」，當地醫科生入學首年已認識呢個病症，但香港常見嘅肝癌同鼻咽癌唔係佢地嘅教學重點，澳洲要求醫科生認識常見兒科遺傳病如唐氏綜合症，但香港進一步要求認識非常見嘅遺傳病如貓啼症。
另一位譚醫生係2017年英國布里斯托大學醫科畢業，佢係當地行醫一年多後就返香港考執業試。譚醫生指出外國醫生未必遇上好多亞洲人嘅常見病，但考臨牀試時係要求用香港病人黎考核，所以能夠通過考核嘅醫生必然認識香港疾病，可以比到市民「真材實料」嘅信心。譚醫生亦提到，海外醫生係香港執業，語言溝通上或會出現困難，嚴重者可出現治療問題。
事實上，醫學界對政府今次免試引入非本地培訓醫生，並唔係好似某位議員所講，怕被搶飯碗。大部份醫生反對條例草案，主要係憂慮本港醫療水平點樣可以維持下去? 政府點樣去制訂一套公平、公正及透明度高嘅評核同審批機制、本地年青醫生同醫科生有無足夠實習同培訓機會，佢地嘅就業前景係點?點解決專科培訓名額不足問題？只可惜，政府單憑長官意志，唯我獨尊嘅精神下，倉卒推進修例。政府面對醫療體系問題，不但無追本溯源，對症下藥，反而一手摧毀行之有效嘅考試制度，罔顧病人福祉。足見羅馬非一天建成，卻可毀於一旦！
沒有留言:
發佈留言