近年，每當政策出現不對位，政府只識不斷搬龍門，迴避問題，最終令社會付出沉重嘅代價!治國如治病，醫生要衡量治療嘅副作用，從政者亦要考慮政策潛在嘅風險。香港大學醫學院院長梁卓偉教授為紀念香港醫學發展130年，係佢本「大醫精誠」嘅著作內，引述咗德國19世紀病理大醫菲爾紹一句名言 “Medicine is a social science, and politics is nothing else but medicine on a large scale.” 「醫學係一門社會科學，政治則無非係更大規模嘅行醫。」治病同治國同樣依賴一支專業團隊，醫生必須以病人利益為首要考慮，給予關懷，用心治理。而為官者亦應謹守 “Do no harm” 嘅信條，即係「先勿傷害」，並必須心懷謙卑，權衡利弊，才作出符合公眾利益嘅抉擇。
我雖然知道政府今日嘅修正案係一定獲得通過，但希望政府係制訂執行措施前，會認真考慮同跟進以下嘅意見：
- 本港醫科生正面對實習同培訓資源不足嘅問題，醫學界憂慮修例後將進一步減少本地醫科生嘅實習同培訓機會，而公立醫院工作量大，引入非本地培訓醫生後，勢必令負責培訓同督導嘅醫生壓力大增。所以，政府必須盡快闡釋具體措施，以確保本地醫科生嘅實習、培訓，甚至就業前景不受影響。
- 政府建議為具備專科資格嘅有限度註冊醫生提供銜接安排，以加入特別註冊制度，喺一定程度上需依賴僱主（即各公營醫療機構）及醫專監管。以上機構作為把關角色，必須設立公平機制確保受聘醫生符合專業水平。
- 政府須馬上聯同上述機構，向公眾、醫學界解說聘用非本地培訓醫生或認可海外專科資格嘅機制及門檻，保證受聘醫生達既定專業水平。
- 特別註冊委員會需要有前線醫生嘅參與，才能反映公營醫生嘅聲音。
- 本港公營醫療服務問題複雜，唔係單靠增加輸入非本地培訓醫生就可解決，政府必須檢討同改善公立醫院軟硬件嘅配套，例如增加病床、手術室同埋其他專業人手。
- 政府必須制定檢討機制，定期檢視透過新註冊途徑黎港執業嘅醫生數字同質素，對公立醫院服務輪候時間、服務指標等影響，以反映今次修例係咪真正有效用。
陳沛然
沒有留言:
發佈留言