政府話醫生唔夠，所以要免試引入非本地培訓醫生。政府經常提出嘅理由，就係本地人均醫生比例比唔上外國。好似今年2月政府就講過，本地人均醫生比例係2.0，即係1000人有兩個醫生，而鄰近嘅新加坡同日本係2.5，美國係2.6，英國係3.0，澳洲係3.8。
外國人均醫生比例較高，我以前都喺呢個會議廳講過，係因為外國好多地方幅員比較大，好多人口稀疏的鄉郊同偏遠地區，仍然需要一定數量的醫生。香港因為人口好集中，喺鬧市亦有好多診所供選擇，有啲仲喺集中喺一座大廈裡面，所以睇醫生好方便。
好多人好鍾意攞香港同新加坡比較，包括話效法新加坡免試引入有認可醫科資格嘅非本地醫生。先講番人均醫生比例，即係幾多人口應該有一個醫生。但大家比較時忘記咗一件事，新加坡係一個國家，佢地嘅政府全權決定人口同移民政策，換句話講，新加坡政府決定到每年，或未來幾年需要幾多外來移民，從而知道要增加幾多醫生。但香港係中華人民共和國嘅一部分，外來人口補充主要靠持單程證嚟香港「家庭團聚」嘅內地人，每日配額係150個，每日俾幾多人落嚟，由內地政府審批，香港政府冇權決定。香港政府唔可以好似新加坡政府咁，決定每年或未來幾年引入幾多內地人。既然香港政府連每年需要幾多外來人口都唔可以自己決定，又點可以準確預測人口增長同人均醫生比例呢？
至於話新加坡公營醫療嘅壓力同負苛都冇香港咁嚴重，但大家忽略咗新加坡嘅稅率高過香港，新加坡人要供中央公積金，公積金唔係薪金嘅5%，而係20%，當中有大約三分一撥入醫療儲蓄戶口，另外仲有強制醫保，低收入者可豁免。而當地公立醫院收費亦比香港高，住院費每日300坡幣，大約1,700港元，雖然新加坡政府津貼大部分費用，仍比香港每日百幾蚊貴。
再睇睇兩地嘅急症室，新加坡喺2019年4月1日起實施新政策，若有人叫救護車，救護人員去到現場作評估，非緊急個案一律唔送醫院，改為建議佢去診所求醫。另外，非急症病人如果喺急症室睇病，收費係274坡幣，大約1,500蚊港紙，非急症病人自然唔會選擇去急症室睇病。所以新加坡唔會好似香港咁，急症室經常爆滿。
香港醫院嘅急症室如果淨係處理緊急同次緊急個案，相信亦唔會搞到唔夠醫生同急症室爆滿。但問題係每年大約220萬人次嘅求診者，當中150萬，即係三分二係非急症病人，只有70萬係急症病人。同一數目嘅醫護，應付70萬個病人一定比應付220萬個病人輕鬆得多。咁點解急症室咁多非緊急病人輪候？好簡單，180蚊診金包埋藥物、抽血同X光檢查等，自然吸引好多非急症病人求診。呢個係政策問題，同人均醫生比例無關。
陳沛然
沒有留言:
發佈留言