上年度嘅《施政報告》，罕有地取消咗致謝動議，我地都冇機會喺立法會就動議進行辯論，成個立法年度就喺吵鬧聲中完結。而家我地之所以喺呢度，並唔係選民再次選擇我地，而係因為特首以冠狀病毒病嘅疫情為理由，將原本喺舊年9月6日舉行嘅立法會選舉押後一年，然後人大常委會宣布立法會延任最少一年。之後因為有4位民主派議員被政府褫奪資格，導致民主派議員總辭，而家嗰議會加埋主席你，得番43個人。我地亦必須承認，而家呢個立法會並冇足夠代表性。
冇咗反對聲音，特首可以再次喺呢個會議廳宣讀2020年度嘅《施政報告》，我地亦可以如常咁對致謝動議進行辯論。但咁樣係咪代表深層次嘅社會矛盾得到咗紓緩，代表咗2019年所出現嘅嚴重社會裂痕得以修復，答案顯然唔係。我要提醒特首同政府，無論嗰啲反對意見幾唔啱聽都好，被取消資格同辭職嘅議員，係代表多數選民嘅意見。而家好多市民對香港前景冇咗信心，想移民嘅人愈嚟愈多，政府作為擁有最多資源去解決問題嘅權力機關，實在負有不可推卸嘅責任。但好可惜，《施政報告》並冇就市民對政府嘅各種不滿，同埋對前景失咗信心對症下藥，喺市民心目中係一份唔合格嘅《施政報告》。香港民意研究所喺去年11月25日特首發表《施政報告》後所作嘅意見調查，有六成四市民表示唔滿意，只有一成九人表示滿意；而由中大亞太研究所做嘅調查，就五成九，接近六成市民唔滿意，只有一成人表示滿意。
我作為醫學界嘅議員，再趁呢個機會對《施政報告》就我關注嘅部分講講睇法：上一份《施政報告》，特首隻字唔提醫療人員喺反修例運動嘅嚴重衝突之中，謹守崗位，堅持專業，一視同仁咁照顧傷者同病人，今次終於喺第31段「同心抗疫」裡面，肯定本地醫護人員嘅不懈努力同貢獻。我亦認為，雖然話疫情反覆，但比起歐美地區普遍疫情失控，香港確診嘅比率低好多，死亡率亦比較低，呢啲主要係因為大部分市民一早做好個人衞生，包括正確佩戴口罩、勤洗手同埋保持家居環境清潔，以及醫護人員全力以赴去做好救治同防疫工作。
但比起鄰近地區，好似台灣同澳門疫情持續受控，保持非常之低嘅確診率同死亡率，香港政府就需要認真學習同檢討。澳門截至1月18日累計46宗確診個案，全部都係輸入以及同輸入有關，冇醫護人員受感染，亦冇死亡個案；台灣截至1月18日累計有862人確診，61宗為本土病例，7個人死亡。相反，香港而家每日確診個案都係幾十宗，1月18日仲飊升到107宗，當中有好多不明源頭個案，截至1月18日已經累積9664宗確診個案，有163名病者死亡，無論確診同死亡數字都遠比澳門同台灣高。主要係疫情一開始，人地喺各個口岸及時做好防疫檢疫措施，基本上做到滴水不漏，滴水不漏嘅意思唔係話零感染，而係有輸入個案都可以搵到源頭加以堵截，令疫情唔會喺當地擴散。
我喺去年1月28日，疫情剛開始時，已經去信政務司司長，建議政府參考「港澳台」模式，考慮實行「香港口岸防疫新措施」。但後來我地知道，政府嘅口岸防疫，或者好多人期望嘅「封關」措施，唔係做得慢就係執行得唔夠徹底，又有好多豁免措施。相比人家嘅滴水不漏，我地嘅口岸防疫可以話漏洞百出。政府係咪都要謙卑啲，參考人地成功嘅防疫經驗，包括口岸防疫措施，做好防疫抗疫工作呢？
《施政報告》第31、33同35段係咁寫嘅： 特區政府對每一位參與抗疫的人士，表示衷心感謝；每一個決定都係基於科學、專家意見和掌握嘅資訊，從沒有滲入任何政治考慮； 必須採取一切「外防輸入、內防反彈」的措施嚴控疫情。喺外防輸入方面，政府已全面收緊入境管制措施； 要求高風險群組接受強制檢測，並更廣泛地推行沒有病徵人士「願檢盡檢」；特首嘅用字，唔係全民強制檢測，特首亦曾經講過：「強制病毒檢測係要有的放矢，唔係全香港無的放矢地做強制檢測。」我期望政府汲取教訓，痛定思痛，努力做好自己承諾嘅防疫抗疫工作。
政府喺舊年答覆我嘅質詢時話，截至10月25日，已錄得 62位任職公、私營醫療機構同事嘅確診個案，但《施政報告》無提及加強醫療人員的保障，之後繼續有醫療機構同事確診，截至今年1月17日，再增加51人染病。我促請當局盡快將 2019 冠狀病毒病納入《僱員補償條例》，以保障同業喺受僱期間因工作確診而得到應有的賠償。 站喺防疫最前線，提供基層醫療服務的私營醫生及牙醫，不但要面對健康風險，亦面臨經營困難， 可惜《施政報告》所提到的三輪「防疫抗疫基金」，並沒有特別支援醫務同牙醫診所的措施，令人失望。
醫療政策方面，著墨比去年少，部分亦大同小異，例如地區康健中心同對罕見病者嘅支援 。我重申，冇將家庭醫生納入核心團隊的基層醫療，係政策方向的錯誤。而既然政府對投放億計資源嘅地區康建中心，喺疾病預防工作寄予厚望，政府似乎並冇利用已經落成嘅地區康健中心，好似葵青嘅康健中心，參與社區防疫抗疫工作，我覺得係浪費資源。
前年發生社會運動後，無數香港人出現不同程度的情緒問題，部分精神受困的年輕人更深感核心價值受到衝擊，對公營機構不信任，私營專業服務價錢又昂貴，對心理/精神科醫療服務卻步。政府必須革新精神健康服務，令到精神科醫生同社工、臨床心理學家等一齊走進社區，參與預防，喺上游攔截個案，提早識別需要協助的青少年。
至於公務員須要宣誓，以確認擁護《基本法》，對香港特區政府負責。政府1月15日所發聲明提到，如公務員有不當或並違反誓言及聲明嘅行為，會按現行機制就不當行為採取相應嘅紀律行動。我真係希望呢把唔係掛喺公務員頭上嘅刀，影響一般公務員喺公餘時間嘅言論思想自由。
最後我想講嘅係，香港醫療人員正喺度盡心盡力咁抗疫同醫治病人，希望社會上不同嘅持份者 ，特別有權力嘅人，唔會「有事鍾無艷，無事夏迎春」，秋後算帳，作出文革式批鬥。面對一波又一波的疫情中，我期望市民能夠摒除政見分歧，為戰勝病毒而奮鬥。本人謹此陳辭。
陳沛然字
沒有留言:
發佈留言